Мыйла велӧдны коми кыв?

Мыйла велӧдны коми кыв? Мыйла велӧдны кӧртавны шнурокъяс кӧм вылысь? Мыйла велӧдчыны механикаа машинаӧн ветлӧдлыны?

Кор ичӧт морт кужӧ кӧмавны шнурокъяса кӧмкот, ме тӧда, мый верма ньӧбны сылы кӧть кутшӧм кӧм. Егор пилы школа мунігкежлас ньӧбим кӧвъя кеді. Медводдза вежонъяссӧ кужтӧгыд ёна и броткис, а сэсся велаліс да весиг ошйысьны заводитліс. Ӧні кӧть кутшӧм кӧмкот ньӧб – ставсӧ  вермас ачыс кӧмавны. Дзик пыр кагалӧн паськалӧ бӧрйысян позянлуныс.

 Кор гырысьяс нин велӧдчӧны ветлӧдлыны машинаӧн, унджыкыс бӧрйӧны механика кӧрӧбкаа машина, а оз автомата машина. Мыйла? А сы вӧсна, мый велӧдчам кӧ механикаа машинаӧн веськӧдлыны, ми вермам сӧвны кӧть кутшӧм машиналӧн руль сайӧ. Велӧдчам кӧ сӧмын автомат вылӧ - быть ковмас корсьны бӧрыннас автомата машина.

Неважӧн ме велӧдчи ветлӧдлыны машинаӧн. Автошколаын медводз юалісны, кутшӧм машина вылын ме бӧръя велӧдчыны - автомата либо механикаа? Зэв окота вӧлі бӧрйыны автомата, ӧд сы вылын ёна кокньыд велӧдчыны. Но бӧръявыв шуи механикаа машина вылӧ пуксьыны. А сэсся машина ньӧбигӧн вель дыр корси коланасӧ, да медым нӧшта на и автомата вӧлі. Эз и сюр, да ньӧбим механикаа. Велӧдчи кӧ сӧмын автомата машинаӧн веськӧдлыны, гашкӧ, дыр на ковмис корсьны.

Да, водзпӧръя миянлы зэв окота мунны кокни туйӧд, ми ог радейтӧй сьӧкыдлунъяс. Но олӧмыс петкӧдлӧ, мый кокни туй оз век ло кокниӧн, сюрасны и сэні мытшӧдъяс. А туй, коді вӧлі сьӧкыдджык, вермас сетны унджык позянлун.

Липучкаа ботинки али кӧвъя кеді? Операторӧн МЧС-ӧ (кытчӧ быть тӧдны коми, роч да англия кыв) али такси службаӧ диспетчерӧн? Мортыслӧн эм мыйысь бӧрйыны.

Бать-мам, кодъяс тӧдӧны коми кыв, зэв кокниа вермӧны паськӧдны ичӧт мортлысь олан туйсӧ. Унаӧн новлӧдлӧны ассьыныс быдтасъяснысӧ сӧвмӧдан кружокъяс вылӧ, но вунӧдӧны сы йылысь, мый эм налӧн семья пытшкас нин.

Дерт, оз быдлаын ков коми кывйыд, но и механикаа машина вылӧ велӧдчӧм оз лэдз ветлӧдлыны автобус да грузовик руль сайын – быть велӧдчыны нӧшта.

Писькӧдӧй да паськӧдӧй челядьлы туй, а кытчӧ мунны водзӧ - найӧ асьныс нин бӧръясны.