Юксьыны

среда, 18 октября 2017 г.

Ворсыштам?

Егор пи ветлӧдлӧ кружок вылӧ, и со корисны вайны ас киӧн вӧчӧмтор, да абу кӧть кутшӧм, а мед вӧлі вӧчӧма шыбитана ёгысь. Мӧвпыштім, мый миян эм сэтшӧмыс, юр гыжйыштім, да аддзим, мый вӧчны.

Эм миян карточкаяса ворсӧм, картаыс уна, но быть кык карта вылын ӧткодь серпас. Мышнас пукталан став картасӧ пызан вылӧ, а сэсся ворсысьлы колӧ восьтавны кык карточка, да сідзи, медым веськалас ӧткодь серпасъяс (мӧд ногӧн кӧ, "Мемори" ворсӧм). Колӧ зэв бур паметь татчӧ! Со ми и шуим вӧчны татшӧм сяма ворсӧм. Босьтім витамин дозъяслысь крышкаяссӧ (чукӧртчылӧма тай коркӧ), конструкторлысь кӧрӧб, реклама листовкаяс (подъездын век тай куйлӧны ӧшинь вылас), крафт бумага пакет (коркӧ мыйкӧ сыын козьнавлісны) да "Йӧлӧга" газет и заводитім вӧчасьны.
Медводз вундалім листовкаяссьыс кружокъяс, сэтчӧ серпасалім коми серъяс "Йӧлӧга" газетӧ видзӧдігпыр, да ставсӧ ляким крышкаяслӧн пыдӧсъясас. Со и лои ворсӧм коми тема вылӧ!
Кӧрӧбсӧ лякалім гӧгӧрбок крафт бумагаӧн, сэтчӧ нӧшта ӧти листовка ляким да гижим ворсӧм нимсӧ (Егор ачыс думыштіс). Кӧрӧбас кутам видзны вевтъяссӧ. Егор нӧшта на и серпасасьыштіс, сэтшӧма сылы кажитчисны коми пасъясыс. 
Аски позьӧ нуны кружок вылӧ выль вӧчӧмтор! А сыӧдзыс окотапырысь асьным ворсам!

1 комментарий: