Няв планета

Ӧти рытӧ садйысь локтігӧн Ёгор пикӧд сёрниӧ воим планетас йылысь. Сёрнисьыс артмис миян мойд, гижышті да вӧзъя тіянлы лыддьыны.

Кӧнкӧ ылын, космосын, эм планета, шусьӧ Няв. Сэні олӧны каньяс. Найӧ ветлӧдлӧны бӧръя лапаяс вылас, кыдзи и ми, йӧз. Налӧн абу сэтшӧм ыджыд керкаяс, кыдз миян. Найӧ олӧны ичӧт керкаясын, миян машина ыджда. Но налӧн эм став изобретениеыс, кутшӧм и миян Му вылын, и весиг миян кодь телепонъяс налӧн эм, дзик Мушар вывса. Эмӧсь и мукӧд изобретениеяс, код йылысь ми ог тӧдӧй.
Ӧти ичӧт керкаын олісны мам кань да сылӧн ичӧтик пиыс. Каньпиыс вӧлі зэв вильыш.

Сійӧ ёна радейтіс цирк, да и ачыс вӧлі циркса каньӧн, сылӧн вӧлі весиг циркӧвӧй номер, 270-ӧд. Ӧтчыд, кор каньпиыс вӧлі выступайтӧ циркын, сійӧ друг уси Няв планета вывсяньыс миян Мушар вылӧ. Усигас космосас сіӥӧ лои ичӧтик кодзулӧн. А кор воис Мушарӧдз, лои бӧр каньпиӧн, сӧмын эз нин вермы сувтны кык бӧръя лапа вылас да кутіс нёльнан лапа вылас ветлӧдлыны. Тӧдтӧм местаас каньпи ёна повзис да пырис медводдза подъездӧ, коді сылы паныдасис. Сэтысь сійӧс и аддзис ӧти тьӧтка.
- Кыдз нӧ тэ татчӧ веськалін? – юаліс тьӧткаыс.
А каньпи сӧмын вермис шуны «Няв!»
Тьӧткаыс босьтіс каньсӧ аскӧдыс гортас, медым тшыглы оз кув, а сэсся гижис Интернетын объявление: «Сюри ичӧтик каньпи, корсьӧ аслыс керка». Менам мамӧй лыддис тайӧ объявлениесӧ да звӧнитіс тьӧткаыслы, миянлы пӧ колӧ татшӧм каньпи! Ми пӧ кутам сійӧс вердны, мольӧдны, кывзыны сылысь кургӧмсӧ да мойдны сылы. Со тадзи миян семьяын овмӧдчис мича каньпи. Шуим сійӧс Бикиньӧн, сы вӧсна мый каньпиыс дзик рыжӧй рӧма, кыдзи шонді или бикинь.
А мый жӧ лои каньпиыслӧн мамыскӧд, кор сійӧ гӧгӧрвоис, мый пиыс воши кытчӧкӧ? Дерт, сійӧ ёна шогсис, ӧд сійӧ радейтӧ вӧлі ассьыс пиуксӧ. Но ми сылы звӧнитім Няв планета вылас да шуим, мед эз шогсьы, каньпиыс миян дорын да сылӧн ставыс бур. Ӧд став каньпиыс коркӧ-некоркӧ мунӧны мамъяс дорысь. Бикиньлӧн мамыс ёна радліс, кор тӧдмаліс, мый сылӧн каньпиыскӧд ставыс бур. А ми сетім сылы кыв, мый кутам видзӧдны Бикинь бӧрся да тӧждысьны.