Юксьыны

пятница, 9 декабря 2016 г.

"Коми блогйысь" конкурс бӧрын

Помасис "Коми блогйысь" конкурс, воторникӧ нимӧдісны вермысьясӧс. Веськаліс вермысьяс лыдӧ и менам блог, кыдзи медмича коми блог!
Козинъяс
Збыльвылас, ме пырӧдчи тайӧ конкурсас сӧмын лыд ради - вермыны эг чайт, сы вӧсна мый уна блогер - сідз шусяна профессиональнӧй гижысьяс. Тайӧ Алена Тувсовъя, Скӧрӧдумса Ната, Тусь (Женя Лобанова) да мукӧд. Найӧ семинаръяс вылын велӧдчӧны гижны висьтъяс, вӧдитчыны кывйыскӧд, кытчӧ нин меным накӧд вермасьны? Дерт, налӧн и лои медбур гижӧдъясыс. Но ме ачым унаысь нуӧдлі конкурс удж вылын, и тӧда, мый кымын унджык пырӧдчысь конкурсас, сымын и бурджык ставныслы. Организаторъяслы бур, сы вӧсна мый петкӧдлӧ вермасьӧмыслысь коланлунсӧ; аслыныс участникъяслы - кыпӧдӧ налысь гижӧм уровеньсӧ, ӧд быдӧн аддзӧ, коді кутшӧм гижӧд пуктіс блогас, да быдӧнлы окота гижны нӧшта на бурджыкӧс.
Конкурсын вермысьяс Ната да Алена Тувсовъя
Мый эськӧ меным сетіс тайӧ конкурсыс?
Конкурс ышӧдіс гижны унджык. Юр помся уджалӧ, мый гижны, кутшӧм тема, мытшӧд вылӧ корсьны вочаалӧм, кыдзи гижны сідз, медым лыддьысьысьяс окотапырысь тӧдмасисны менам мӧвпъяскӧд. Быдтор, мый лыддя да тӧдмала, ас пыр лэдза - кыдзи тайӧ меным отсалас блог нуӧдӧмын? Овлӧ, войнас воас кутшӧмкӧ мӧвп - и сэсся войбыд оз узьсьы, окота дзик пыр гижны.
Со тадзи артмӧ гижӧд
Ковмис мӧвпыштны и мичмӧдӧм йылысь. Кымын выль кыв ме тӧдмалі, пока уджалі аслам блог вылын! Фавикон, граватар...Фавиконсӧ лӧсьӧдӧмӧ муніс не ӧти час да весиг лун, а збыльвылас зэв ӧдйӧ вӧчсьӧ - меным кыдз филологлы сьӧкыд гӧгӧрвоны блоглӧн техническӧй юкӧнсӧ. Но артмис тай! Кыдзи дасьтыны фон, лӧсьӧдны соцсетьясын юксян кнопкаяс, вылӧ катӧдан стрелка - ставсӧ тайӧс ковмис лыддьыны, тӧдмавны, пуктыны. Но кымын водзӧ, сымын кокни. Окота висьтавны ыджыд аттьӧ Елена Быстровалы, ме кор медводдзаысь аддзи сылысь блогсӧ, менам вомкаличӧй сӧмын паськавліс - кутшӧм мича! Мыйсӧ сӧмын абу пуктӧма аслас блогас! Со кутшӧмӧн колӧ лоны блоглы, думышті ме да дзик пыр босьтчи уджӧ. Мися, гижӧмын кӧ ог вермы, то мичмӧдӧмын шансыс лоны вермысьӧн унджык.
Ю. Лисовскийлысь серпассӧ вӧчи блоглӧн фон пыдди
А нӧшта аддзылі ӧткымын блогеръясӧс ас синмӧн (тані колӧ сералысь смайлик). Ӧткымын мортӧс, дерт, тӧда, но, шуам, некор на эг пандасьлыв Натакӧд. Гашкӧ, коркӧ нуӧдам блогеръяслы семинар сяма? Кӧні позьӧ тӧдмасьны ловья олӧмас, юксьыны асланым тӧдӧмлунъясӧн да ышӧдны водзӧ гижны.


4 комментария:

  1. Меным юрӧ воліс жӧ.)) Гашкӧ, кӧть тшай юигмоз семинаритчӧм.))) Мед кокниджыка быдӧн асьсӧ кыліс.)

    ОтветитьУдалить
    Ответы
    1. Женя, кор Ылі Кавказсьыд воан, сэки позьӧ мыйкӧ думыштны))

      Удалить
  2. Зэв бур мӧвп! Меным эськӧ окота жӧ вӧлі сёрнитыштны тіянкӧд, а сідз жӧ велӧдчыны мичмӧдны блог!

    ОтветитьУдалить
    Ответы
    1. Ната, сідз кӧ, быть ковмас мыйкӧ нуӧдны))

      Удалить