Юксьыны

вторник, 6 декабря 2016 г.

Ёг йылысь

Уна кад нин лыддя интернет пыр Питерын ёг торъя бакъясӧ шыблалӧм йылысь. Кӧнкӧ пыдын ышловзьыла, мый миян Сыктывкарын сэтшӧмыс абу, да бара водзӧ. А чукӧртӧны сэні унатор - и пластик, и стеклӧ, и пленка, шинаяс - ставсӧ дыр лоӧ лыддьӧдлыны. Овлӧ, гижа Питерын олысь чойлы - мун да ну ассьыд ёгтӧ налы, видз миянлысь мунымӧс. Сійӧ сӧмын шеныштӧ кинас ме вылӧ. Но и миян карын позьӧ ӧттор-мӧдтор сетны мӧдысь вӧчӧм (повторнӧй переработка) вылӧ.
Ми верӧскӧд важӧнкодь нин, воысь дыр, торйӧн чукӧртам гумаг. Дзик сійӧ кадсяньыс, кор Сыктывкарын мыччысисны лӧз да кольквиж ёг чукӧртан контейнеръяс. Тайӧ ньӧти абу сьӧкыд - медводз сюялам гумаг-газет шкап ящикӧ, а кор сэні местаыс оз нин коль, верӧс пикӧд садйӧ мунігмоз шыбитӧны лӧз контейнерӧ. Гожӧмланьыс вошлісны контейнеръясыд,  да зэв деливӧ вӧлі газеттӧ шыбитны мукӧд ёгыскӧд ӧттшӧтш. А ӧні бӧр сувтӧдісны. Оррчӧн сулалӧ кольквиж контейнер - сэтчӧ позьӧ шыблавны пластикысь вӧчӧм ва юан бутылка, сӧмын ми гежӧда ньӧблам ватӧ да оз и чукӧрмывлы прамӧясӧ.
Сэсся ме дугді шыблавны чипанкольклысь кышсӧ, лыдди, мый сійӧ зэв бур удобрение быдмӧгъяслы. Чукӧртам дозмукӧ, посньӧдлам, а тулыснас нуам сиктӧ. А чипанкольк кыш бӧрся ачыс заводитіс косьмыны и мандарин корка, и бананлӧн кышыс...Изӧм колясыс олӧ балкон вылын да виччысьӧ ассьыс кад.
Да, дзик вунӧді энергосберегающей лампочка, жугалӧм градусник да батарейка йылысь. Найӧс тшӧтш чукӧртам, а сэсся нуам экомобильӧ, расписаниесӧ водзвыв гижӧны Комиинформ вылын.
Ёгыд ёг ведраын этшмис, серав кӧть эн.
А тӧрыт лыдди, мый Сыктывкарса университетын студентъяс кутасны чукӧртны макулатура да пластик - шампунь да быдсяма весасян химия улысь дозмукъяс. Лукйысьышті ваннаын да сюри жӧ куим бутылка. Талун жӧ и нуи зэв ӧдйӧ. Менам воигкежлӧ пластик чукӧртан урнаас ӧтка бутылка сӧмын куйлӧ вӧлі. Ёг позьӧ вайны талун да аски.
Юалі организаторъяслысь, а кытчӧ найӧ нуасны чукӧртӧм дозъяссӧ? Гумаг да пластиксӧ СГУ-сянь веськыда сетӧны "Комиэковтор" компаниялы, а найӧ нин сэсся ыстӧны переработка вылӧ.
Ышӧді и мамӧс сиктын торйӧдны пластика ёгтӧ. Миян мушарным тырӧма нин лӧп-ёгнас, Франциын пакетъяснад оз нин позь вӧдитчыны - татшӧм закон сэні кырымалӧмаӧсь таво, а ми век на ӧтгудыр ёгтӧ шыблалам да свалка быдтам...Гашкӧ, кад воис думайтӧмӧн ёгӧссьыны?




Комментариев нет:

Отправить комментарий