Юксьыны

воскресенье, 27 ноября 2016 г.

Роч али коми?

Кор ме вӧлі зэв на том, кагатӧм ни верӧстӧм, муккӧддырйи вӧлі думыштча - а кутшӧм кывъя быдмасны менам челядь? Роч? Коми? А мыйла роч, ме кӧ ачым коми? И кыдзи менам роч челядь кутасны сёрнитны ыджыд бать-мамыскӧд? Тані менам юрын век петкӧдчыліс кутшӧмкӧ серампетана картина, да аслам думъясӧй тайӧ тема вылас век помасьлісны ӧткодя - "навернӧ, кута комиӧн сёрнитны". Менам ӧні быдмӧны коми кывъя челядь, но зэв уна тӧдсалӧн челядьыс сёрнитӧны рочӧн.
Дерт, быд бать-мам асьныс тӧдӧны, кыдзи налы бурджык быдтыны челядьӧс. И кутшӧм кывъяӧн - тшӧтш. Кодкӧ жалитӧ, мый эз артмы быдтыны кык кывъя челядьӧс, мый оз сёрнит сылӧн кагаыс комиӧн. Но ставныс вӧчисны сідз, кыдзи налы бурджык ли кокни.
Ме юалі налысь, мыйла тадзи артмис?

пятница, 4 ноября 2016 г.

8 места, кытчӧ позьӧ ветлыны челядькӧд ноябр тӧлысьын.

Менам эм ӧти зэв ыджыд проблема  - ме некор ог вермы запомнитны, кӧні мый мунӧ, кутшӧм спектакль-концерт. Но, шуанныд, аддзис тай мытшӧд, гиж бумаг вылӧ дай всё. Да бумагыс менам век вошӧ, блокнот век кӧнкӧ абу син улын. Та вӧсна тӧрыт пукышті интернетын, чукӧрті быдсяма юӧр да сюйи телепонӧ календарӧ, кӧні мый да кор кутас мунны. А сэсся и татчӧ гижа.
Внимание! Пӧшти ставыс нуӧдсьӧ челядьлы, шойччан лунъясӧ!

четверг, 3 ноября 2016 г.

Йирым тӧлысь - октябр. Шоныд войтъяс.

Октябр помасис, а ме пасйышта, кыдзи сійӧ коли.
Тӧлысь заводитчигас верӧс муніс экспедицияӧ чукӧртны фольклор, а ми челядькӧд, дыр думайттӧг, журнитім Висер вожӧ, челядьлӧн ыджыд мам да ыджыд батьыс ордӧ. Шойччим, лолалім чӧскыд сынӧднас, чукӧртім бӧръя тусь черноплодкалысь. Ыджыд мамыс косьтіс тусьсӧ, а сэсся кутам юны чӧскыд чай кузь тӧвся рытъясӧ.
Ӧктім чӧскыд тусь