Юксьыны

воскресенье, 24 января 2016 г.

Кӧдзыд пӧльлӧн чужанінас. 2 юкӧн

 Югдін - рочӧн кӧ, Великий Устюг - важся кар. Меным кажитчис, мый эм ӧткодьлун Сыктывкаркӧд. Кыдзи и миян карын, Югдінын эм важся кар - купечъяслӧн керкаяс, вузасян лавкаяс, сулалӧ ю бокын. Берег пӧлӧныс зэв уна вичко, помся, вичко бӧрся вичкӧ сулалӧ. Аминь мича!


Кутшӧмкӧ вичко уджалӧ, кутшӧмкӧ оз, кӧнкӧ  культура учреждение - библиотека да музейяс. Пыралім этнография музейӧ, коді вичкоын вӧчӧма. Меным сэні кажитчис кыктор. Ӧти кӧ, асьныс экспонатъясыс интереснӧйӧсь, а мӧд кӧ, вичко пытшсӧ аддзылім. Важся паськӧм, керка пытш, чачаяс, во гӧгӧрся олӧм, удж - ставвсӧ петкӧдлӧма.

Уна купеч керка сулалӧ, тӧдчӧ, мый водзті тайӧ вӧлі вузысьысьяслӧн ыджыд кар. Тайӧ керкаясас кӧні лавка, кӧні садик, кӧні культура учреждение, кӧні карса администрация. Пыралім сёйны кафеӧ тайӧ местаас - эз кажитчы, и дона, и чӧскыдтӧм. Миян гостиницаын вӧлі чӧскыдджыка пусьӧны и донтӧмджыка вердӧны.
Купеч керкаяс бӧрся  заводитчӧны пу керкаяс, кыдзи и Сыктывкарын. Тшӧтш позьӧ аддзыны уна мичатор - и важся наличникъяс, ӧшинъяс. Чуймӧдіс ӧти керкаын каньлы петан туй веськыда ӧшиньсяньыс.
Вель окота вӧлі ветлыны завод "Северная чернь" вылӧ. Тайӧ заводас эзысь вылын вӧчӧны узоръяс - чернёнӧй - сьӧдӧдӧны. Важся аслыспӧлӧс ремесло Югдінын. Позис эськӧ видзӧдлыны и мастерылысь уджсӧ, и аслыд видлыны вӧчны узор. Сӧмын ми тшук сиптысигкежлас воим да ковмис сӧмын ышловзьыны. Пыралім заводбердса магазинӧ да сэтысь видзӧдлім мичаторъяссӧ - эзысь исерга, чунькытш, браслет чернёнӧй узора.
Асьным ми олім мӧдар ю пӧлӧнса гостиницаын, коді шусьӧ Гледен. Верӧс висьталӧм серти, археологъяс аддзӧмаӧсь татысь культурнӧй слой, сідз шусяна гледенскӧй культуралысь. Тайӧ культураыс вӧлӧма важся комилӧн. 
Гостиницаыс мича местаын, пожӧма вӧрын, лӧнь да бур. Дерт, абу кар шӧр, подӧнтӧ ылынкодь лоӧ. 
Тайӧ карыс колис ас йывсьыс кык пӧлӧс впечатление. Ӧтар боксянь, тӧдчӧ, мый карыс гӧль, лёк весавтӧм туйяс, киссьӧм керкаяс да вичкояс. Мӧдар боксянь кӧ, кодлы окота ас синмӧн аддзывны важся олӧм - татымсь позьӧ унатор аддзыны и тӧдмавны. Чайта, мый и тіянлы окота лои ветлыны Югдінӧ.
Фотоыс Микол Ӧльӧш Рассыхаевлӧн.

2 комментария:

  1. Ответы
    1. Ме зэв ёна и сералі, и шензи та вылын! Содсӧ вель кузя вӧчӧма, муӧдзыс.

      Удалить