Юксьыны

среда, 16 декабря 2015 г.

Кӧдзыд пӧльлӧн чужанінас. 1 юкӧн

Ӧти рыт батя-пиа садикысь локтӧм бӧрын пыригмоз, порогсӧ весиг эз на удитны  вуджны, меным шуисны - ми кӧсъям Кӧдзыд пӧль ордӧ ветлыны гӧститны, Югдінӧ! Но мися, зэв тай бур. Сэсся мӧд луннас пуксим верӧскӧд ноутбук сайӧ, пырим интернетӧ да вель ӧдйӧ корсим гостиница (комиӧн пӧ гӧстиница - тадзи шуис Егорка) и поезд вылӧ билетъяс. И со ми пукалам нин поездын, мунам Кӧдзыд пӧль дорӧ!
Сыктывкарсянь медводз воим Котласӧ, сэні пуксим автобус вылӧ да рытнас нин веськалім Югдінӧ. Мӧд луннас мӧдӧдчим Кӧдзыд пӧльлӧн вотчинаӧ. Вотчинаыс километра 15 сайын Устюгсяньыс, пожӧма вӧрын. Автобусъяс сэтчӧ ветлӧны зэв гежӧда, ми таксиӧн мунім. Пыранінас мынтысим, билетыс лунтыр кежлӧ. Медводз миянлы ковмис мунны Мойдъяслӧн туй кузя, кӧні ми паныдалім Ёма баба, Шуршик - Кӧдзыд пӧльлӧн отсасьысь, багатыр да мукӧд мойдся персонажъяс. Найӧ лӧсьӧдӧмаӧсь вӧлі миянлы мытшӧдъяс - нӧдкывъяс тӧдмавны, либӧ пос вуджны, черань веза лабиринт кузя мунны. Сӧмын кор ставсӧ прӧйдитім, вермим мӧдӧдчыны Кӧдзыд пӧльлӧн керкаас.
Керкаас сылӧн мыйыс сӧмын абу! Обсерватория, лаборатория, библиотека, коз пу музей...Музеяс чукӧртӧма киӧн вӧчӧм коз пуяс, кодъясӧс ыстӧмаӧсь челядь став Россияысь. Мыйыс сӧмын абу вӧчӧмаӧсь! Тані и кольясысь коз пу, и бумагаысь, и дӧраысь, весиг пинь тщӧткаысь  да лызьяслӧн ныръясысь! Эм и коз пу,увлань юрӧн ӧшалӧ пӧтӧлӧксянь.
Библиотекаас чукӧртӧма уна войтырлысь мойдъяс. Эм торъя жыр, кӧні петкӧдлӧмаӧсь Кӧдзыд пӧльлысь ёртъяссӧ - Костромаысь Снегурочка, Яренскысь Матушка-Зима, Кировысь Кикимора. 
Аддзылім ми Кӧдзыд пӧльлысь и узьланінсӧ, и вежсянінсӧ. Паськӧм-кӧмкотыс сылӧн уна! И мича наряд, и исласян костюм, и гожся паськӧм. Гожӧмнас, вӧлӧмкӧ, Пӧльыд ветлӧдлӧ сюмӧд кӧмкотӧн. Дзик нин помас воим Кӧдзыд пӧль дорӧдз. 10 минут и сюри сыкӧд сёрнитнысӧ. Юаліс челдьлысь, коді кытысь локтӧма, челядь висьталісны кывбур, Кӧдзыд пӧль козьналіс ставныслы кампет да верительнӧй грамота, сэсся ставӧн фотографируйтчим, да та вылын и помасис миян Кӧдзыд пӧлькӧд пандасьӧм. 
Кӧдзыд пӧль кольччис аслас жыръяс, а ми водзӧ мунім. Эм сылӧн вотчинаас зоопарк, кӧні ми час кык гуляйтім. Сэні аддзылім и йӧраӧс, и кӧръясӧс, ош-кӧин-руч, лэбачъясӧс, а кроликъяссӧ позьӧ весиг киӧ босьтлыны да мольӧдыштны. Позис пыравны и кузничаӧ, и турун аптекаӧ, но ми сэк кежлӧ мыдзим нин. Пыралім сӧмын Кӧдзыд пӧльлӧн ледникӧ, кӧні ставсӧ вӧчӧмаӧсь йиысь, зэв сэні кажитчис, но аминь нин кӧдзыд да зэв ӧдйӧ сэтысь  бӧр петім. А поштаыс йигана вӧлі, но Югдінас эм жӧ поштаыс да ми мӧд луннас сэтчӧ ветлім. 
Вотчинаас лунтыр кежлӧ миянлы тырмис гуляйтны. Мӧд луннас шуим видзӧдлыны карсӧ. Карас Кӧдзыд пӧльлӧн эм резиденция, пошта, Дом моды. Резиденцияас ветлім, видзӧдлім, сэні Выль вося открыткаяс чукӧртӧмаӧсь, эм мастерскӧй, петкӧдлісны, кыдзи вӧчсьӧ вологодскӧй кружево. Ёгор сэні вӧчис снеговикӧс. 
Меным медся ёна кажитчис Кӧдзыд пӧльлӧн пошта вылас! Тырыс письмӧ челядь гижӧмаӧсь, став Россиясьыс да весиг мукӧд странаясысь, и став письмӧыс воӧ Кӧдзыд пӧльлы. Мукӧд письмӧ вылас весиг шыасьӧны, ыстӧны поштасяньыс козин. 

Но а мукӧдтор йывсьыс, мый ми аддзылім Югдінын, гижа мӧдысь.


2 комментария:

  1. Молодечьяс тай! Ми зэв нин дыр мӧдӧдчам да эг на воӧй!)) А ичӧт челядя мамъяс йылысь Кӧдзыд пӧльыд мӧвпыштӧма абу?

    ОтветитьУдалить
    Ответы
    1. Алена, тэ кӧ шуан коляскаӧн ветлӧм йылысь, то позьӧ уналаӧ веськавны, но керкаас он вермы пырны, сэні содъяс, пандусыс абу. Ми эргорюкзак босьтлім. Вотчинаас эм гостиница, позьӧ веськыда сэні овмӧдчыны да луннас пыравны шойччыны, а ми пыралім гостиницаса кафеас, сэні эм зэв лӧсьыд диван фойеас, ми сэні вердчим, ена некодлы оз тыдав)))

      Удалить